Dagiti agakem:
IMMANG
IMMONG
ANGKUAN

INTRO:

Music: Oh, Naraniag a Bulan

ANGKUAN:
Sakbay man iti amin, kablaawandakayo.
Iti naimbag a kanito wenno orasyo,
Kadakayo amin nga immay timmallaong
Kadaytoy bukanegan a nailungalong
Pagraragsakan ti amin a naisar-ong
Iti Bilingualpen.com a nasudi
Ti idadanggayyo nalaus unay ti yamanmi
Ti regget ken anusyo nga awan naisupadi
Siak ni Angkuan, ti mangiturturong a napusgan
A mangurnos kadaytoy a bukanegan
Ket ibaskagko ngaruden ti tema a pagsubangan
Ti nalibnos a balasang ti bukanegan
Ni Immang a kapipintasan
Ken baro, ni Immong a katataeran
Daytoy ngatan ti karirigatan a husgaan
Iti biag ti maysa a balasang piman
Ta ayat kontra seguridad ti saritaan
Banag a dakkel la unay iti pangabilan
Iti ilablaban tunggal maysa a makunan
Ni ading balasang addan nobiona
Nanumo a mannalon a kinaubinganna
Naragsak man unay ti ayan-ayatda
Ket nagkinnarida iti tunggal maysa
Nga isuda laeng a dua aginggat-inggana
Dimteng maysa a balikbayan, umay mangasawan
Sadiay California nga inna naggapuan
Itugotnanto ti asawana ken kasimpungalan
Ngarud iti ababa a patangan wenno tungtongan
Ni ading balasang ket nakursonadaan ni balikbayan
Dagiti dadakkel unay a managayat
Nariknada a dakkel unay dayta a gasat
Tapno makaalut-otda met iti rigrigat
No mapetisionandanto California, di ket mayat
Ngem iti rigatna, ni ading balasang dina kayat
Irupirna ti ayan-ayatda ken manong baro
Ta kunana nga awan serbinan ta dandanin agkubbo
Uray pay no daytoy nangikari iti biag a narungbo
Dina latta kano mairusok a kakinepkep ti lakay a kalbo
Kaykayatna agsida iti inabraw ngem ti bulalo
(Mnm, ania ket daytan?)
Daytoy ngarud ti inda pagsusikan
Da Immang ken Immong iti bukanegan
No rumbeng kadi ni ading balasang makikallaysan
Wenno saan, ti ayan-ayatda ken baro patuloyennan
Dagiti dadakkelna inna ida pagsaanan
Narigat la ketdi a panunoten ken solbaren
Ti parikut ti balasang a naidatagen
Ta ayat kontra biag a natalingenngen
Isu a ti panagutob a nalaing iti kaskenanen
Ti isip ken rikna nasken unay a timbangen
Ket sakbay nga innak man awagan a sumao
Da Immang ken Immong iti website-tayo
Ken mangitantandudo bukod a kulturatayo
Kiddawek man kakabsat ken aminkayo
Palakpakantayo ida iti napalpalalo!

IMMONG:
Yupreserkon ti bagik, ti umuna nga agsao ket siakon
Iti kinaadu ti sinao ni apo mangiturturong natektekanakon
Ti agikalintegan ayna, kunak man, magagaranakon
Ta dilak man ne, aggagatelen, di makaurayen kakadua
A mangikalintegan iti babai rumbeng a pilienna ti makikallaysa
Iti balikbayan nga adu unay iti kuartana
(Arasaas: padigoannakto, wen?)
Ti balikbayan yegna kenka iti kinanam-ay, isu a tukmaamon
Sakbay nga agtinnag iti sabali a babai, pagbabaywamton
Ti kasta nga opurtunidad ket maysa laeng iti minilmillion
Isu nga idurogko kenkan, wen, kunamon, kapuymon!
Saan laeng a para kenka no dipay ket iti pamiliamon
Yaonnakayo iti kinakurapay a kumubkubokob iti talon

IMMANG:
Ading balasang toy kabaddungalak dimo patpatien
Ti balakadna kenka pudno unay a mangirurumen
Ta balakadannaka ketdin iti aramid a makadurmen
Ta kasano koma a makidennaka iti dimo ay-ayaten
Amangan no iti bisongna laeng ket inka maarieken
Imbes nga imasem, ti aprosna ket inka pay agkulagtiten
Lalo no ti sang-awna ket angot imburnalen
Dayta innem a pulo ket pito nga edadna
Amangan no dina pay maguyoden ti ulesna
Wenno dina pay maballasiwen ti salladayna
Natuok a ti biag ti naasawaan a kasta
Ta di asawa-kaliwanliwa sapsapulenna
No di ket caregiver a mangaywan kenkuana
Uray no pagpunganam ken pagulesmo ti kuarta
No ti biagmo ket kasla kawaw a niog a kunada
Awan ragsakna ket nalabit a malipatam pay agkatawa

ANGKUAN:
Pakauna pay laeng dagita iti nabara a saritaan
Iti sinnungbat dagiti dua a bukanegan
Kas iti nakunak itay damdamonan
Ti lalaki ayunannan ti balikbayan a pakiaasawaan
Ta mangited kano iti biag a nasaliwanwan
Saan laeng a para kenkuana no dipay ket pamilianan
Rikna ken puso met ti inkalintegan ti prinsesa
Wen met piman, saan a masasaan dayta
Ta napateg iti tunggal agassaawa ti ayat iti nagbaetan
Ta ti ayat ket ti lubong pagtayyekenna
Kasta met iti naragsak a pamilia
Ala, ituloytayo ngarud ti tungtongan
Sika a malalaki ti bukanegan tumakderkan
Ta ti tallaong ket palakpakandakan!

IMMONG:
Amin a tattatao ket nagarapaap iti biag a nasayaat
Ti matmaturog iti datar, iti kama kayatna met iti sumang-at
Lastog ti mangibaga, no ti opurtunidad ket dina kayat
Isu daytan ‘tay kunada, ti makaturog, makamukat!
Nagadu iti agkalikagum iti istet ket makapan
Aramidenda amin a banag ken pamuspusan
Ngem sika ading, ti wenmo laeng inkan maragpatan
Ngem namikkika pay laeng agimmamadi a kunadan
Isu a kallaysan kunamon, sakbay nga agawandakan!
Bay-am lattan no lakay dayta
Ti nasken ket nam-ay iti yegna kenka
Saan ket rarasa iti panagsesekka
Wenno budo panaggapas a pagbinatlagennaka.
Ti nasken ket nabungkong ti petakam
Pagpunganam ken pagulesmo ta kuartam
Ti apros no dimo mairusok, inka lattan kideman
No agat-imburnal sang-awna, ay, ket Listerinan
Ta adda aya parikut a di masolbar itoy a panawen
Lalo no ti nam-ay ti biag ti saritaanen
Ti sulosion ket adda amin-aminen

IMMANG:
Ngem saanmo a maisuro ti diktar ti puso
Ta kunaman ni Sharon Cuneta nga idolo
“Bakit pati ba naman pintig ng puso pakikiaalaman mo”
Nasaysayaat iti asida iti tununo a tarong ken bugguong
Ngem ti agsida iti letson a dika met matilmon
Nasaysayaat ti kaubingan a kasinnallabay
Ngem ti lakay a ti pagnana ket agpilaypilay
Ti barukong ti ub-ubing ket nakidser a pagsadagan
Saan a kas iti lakay iti angkitna inka pay maakaran
Isu a bay-amon dayta a balikbayan a laklakayan!

IMMONG:
No ti balikbayan ti pakiaasawaam, adingko
Amin a kayatmo a gatangen ket magatangmonto
Amin a kayatmo a sidaen ket masidamto
Amin a kayatmo a papanan ket magtengmo
Sunod sa uso a kunada, aminto a kawesmo
De mek-apkanto pay ket ngatan pintas a kimmaro
Dagiti kapatadam ay, ket umapaldanto
Iti gasgasatmo a napalpalalo
Isu a saankan nga agmadimadi
Lalo ket manmano iti kastoy a gasat kadi
Ipalapalmon dayta “tibok ng puso” dita ta nagkorni
Ni dipay makagatang iti uray no wamport laeng a karni
Lalo no panawen ti gawat a kunada
Panawen a gumawgawawa bituka iti namanteka

IMMANG:
Saan! Saanmo a patien dayta a kasalisalko
Ta amangan no katkatawaandanto laeng liklikodmo
Lalo agkuyogkayo a dua ket uk-ukodemto
Ayna, kuartana ti inamlanna kunkunadanto
Sikanto daytan kasla agruprupa kuarta
Lalo ket nagadu met dagiti tsismoso ken tsismosa

IMMONG:
Umapal la ketdi dagiti agkunkuna iti kasta
Ngem iti unegda ay, ket napno nalaus unayen apalda
Naggasaten, siak koma man met, nalimed nga ibagbagada
Isu a bay-am dagita a tsismoso ken tsismosa
Ipaidmo ketdi dagita kuartam ta agmulagatda nakalawlawa
No adda ti agkasapulan tulongam ketdi ida
Iti di agbayag makitadanto ti imasna
Iti mangasawa iti balikbayan nga adut kuartana!

IMMANG:
No nagsikogka ibagadanto a dimo sikog dayta
No di ket sinapulmo ragsak iti sabali a denna
Malalaiskanto imbes nga idayawdaka
Kakabagian ni lakaymo sikanton kadurmenda

IMMONG:
Ti makiaasawa, dimo laokan iti aramid a madi
Ti panagsapul iti ragsak iti sabali ket aramid a kinatiri
Mailaksid dayta iti naimbag nga adal ken ugali
Aramid daytan ti mangibabain iti puli

IMMANG:
Ti natural a kaipapanan ti babai ket ti panagbalinna nga ina
Ngem iti edad dayta a balikbayan agduaduak a maitedna
Lalo no dayta a lakay ket di agtaraok kawitanna
Uray ngata no pamelmelam iti sangasalop a Viagra
No panagtutukkolen sippit awanen a talaga
Riknamto ti kasla naiyaw-awan iti kaulpan
Umapalkanto kadagiti inna a ti maladagana inna inubban
No dayta lakay ti pakiaasawaam, dimonto mapadasan
Ti “the essence of a woman is to become a mother” a kunadan

IMMONG:
Saan amin a nagasawa iti anak naparaburan
Nupay kasta adda met dagiti nagbiag iti kararagsakan
No ubing laeng ti inka kasapulan
Nagadu dita a maampon a kaanakan
Wenno dagiti ubbing nga agur-uray iti pagamponan
Maisagutam pay ida iti naraniag a masakbayan
Gapu amin dayta ken lakay a balikbayan

IMMANG:
A, basta kaniak ti nobiok ti pakasarak
Ta iti dennana ket naragsakak

IMMONG:
Ngem naragragsakka no ti balikbayan ti piliem
Nanam-ayka ta kuarta laeng ti paggunayem
Uray no agtugtugawka nga agmalmalem
Wenno iti spa ken parlor inaldawem

IMMANG:
Rumang-aykaminto met a, ta agbadangkami
Adda ti ragsak iti nagbaetanmi ta agayan-ayatkami
Saan a kas dayta balikbayan a masugkarak kadi
Amangan no mabangungotak pay no kaiddak iti rabii

IMMONG:
No mintalon a ket, mintalon lattan
No balikbayan, welcome kenka ti Californian

IMMANG:
Dimo laisen dagiti mannalon
Ta no awanda awan met ti taraon
Adu met ti narang-ay ti biagna a mannalon
Lalo no apitda ket nakalablabon
Nasimbeng pay panunotda a kunakon
Ta adda ti ayat iti uneg ti pamiliada a nailukon
Saan a kas dayta balikbayan a ti rikna ket pinilit
Amangan no siak pay iti mabagtit
Isu a kaykayatko labko a mintalon
Ta nasimbeng panunotko magdamag at maghapon
Isu dayta ti puon ti ragsakko a kunakon
Isu a kuartam laeng dayta kuartam, kukuamon, kunakon
Dumtengto met dayta kadakami a mannalon
No ti apitmi a pagay, tabako, natnateng ket nakalablabon!

IMMONG:
Ngem sika ti agtrabaho, trabahoka a trabaho
Amangan no dimo pay makudkod dayta a nagatelmo
Lalo ket nakangingina itan insektisidio ken abono
Santo pay la simmapit bagyo, amusayam subsobmo
Ni balikbayan nanam-ay ti biagmo
Uray no ipayongandaka pay no iti talon ti turongmo

IMMANG:
A, basta ti mintalon ti piliek!

IMMONG:
Balikbayan a, ta ti biagmo nataltalek!

IMMANG:
Dika mangisuro iti liday a lak-amekto!

IMMONG:
Sursuroanka iti pagimbagam!

IMMANG:
Saan! Iturturongnak iti innak pagsangitan

IMMONG:
Kurimammamka a talaga, no dika paisuro!

IMMANG:
Sika a, ta utekmo ti linoloko
Agibalakadka iti dinedemonio!

IMMONG:

Agtungpalka iti pagayatan dagiti nagannak kenka
Saanka koma a nasukir nga inanak ken agbalin a dangnga

IMMANG:
Siak iti makiasawa ken makidenna saan nga isuda
Isu a karbengak iti agpili nga awan ti diktarda

IMMONG:
Kinasukir ti saan nga agtungpal iti nagannak

IMMANG:
Saan a kinasukir
No ti kalintegan ket irupir!

ANGKUAN:
Hep, hep, hep! umap-apuyen ti saritaan
Sakbay nga agkinnuddot dagiti dua, gapu iti patangan
Nasaysayaat laengen nga innak ida ballaetan
Ta uray ket ti rason iti tunggal maysa nasaoda amin ngatan
Ket kadakayo met kakabsat, amin aminkayo ditan
Ti susik dagiti dua intay man nangngegan
Ngarud asino ngata aya iti rumbeng nga iti ulona putongan
Iti korona ti bukanegan bilingualpen.com a kaindaklanan?
Ti lalaki, nam-ay ken seguradidad ti rasonna
Banag a dakkel la unay a pagpuntosan dayta
Ta asino met aya iti saan a mangayat iti nam-ay
Iti panagbiag nga adut’ kuartana pudno met a di naliday
Ayat, pinnateg ken panagtutunos ti ilablaban ti binabaian
Ta pudno met a naragsak ti biag gapu iti ayat a kaindaklanan
Ti maysa a pamilia a binangon iti ayat ket kapintasan unay
Banag a ti rasonna no puntosan ket dakkel la unay
Ngem sakbay nga intay ida husgaan dagiti nagsalisal itay
Ti ayug-samiweng Kailokoan denggentay man pay
Tokar man Abogada Sherma, kunak man nga ipayapay!

MUSIC: Ilocano Song, preferably, “Ti Ayat ti Maysa Nga Ubing…”

(Then)

ANGKUAN:
Narigat a husgaan no asino kadakuada a dua
Iti intay putongan iti naidaklan a korona
Isu a gagayyem, addik, innak ken ammak ida
Dagiti pay lolo ken lola a nakaimatang dita
Dakayo man a iti manghusga kadakuada.
Asino man umayon ken Immang a binabaian
Ikur-itna a komento ti rasonnan
Asino man umayon ken Immong a kalakian
Ikur-itna a komento ti rasonna
Ta namaymayat met laeng no ti manghusga
No dagiti nagbasa a kaliwanliwa…
Ala ngarud, patpatgek unay a netizen
Inkay agpili ken agtimbangen
Ti kananakem ken karirikna isuraten
Ta ti ray-aw itay paey laeng a narugianen!
(30)