I. Sipupudno nga ikannawag wenno isuratko ti ania man a pasamak wenno pagteng— siaannad a saan a mailemmeng dagiti kangrunaan nga impormasion wenno makillo ti kinapudno babaen ti panaglibtaw wenno di umno a panangigunamgunam. Siaammoak met iti pagrebbengan a maibatad ti kapanunotan ti bangir a partido ken ti pagrebbengan a dagus a manglinteg iti agdadata a kamali.

II. Diakto lukaisan dagiti nasken a mailimed nga impormasion wenno material a naitalek kaniak kas paset ti kinamannuratko. Ikagumaak ketdi nga isikkir, ilaban ken ipalgak ti kinapudno a pagturayan ti hustisia, kinalinteg ken kinadalus babaen ti nainkalintegan,  manakman ken kaimbagan a wagas.    

III. Agusarak laeng iti patas ken nadalus a wagas iti kalikagumko a makaala iti impormasion, damdamag, ladawan, ken/wenno dokumento, ken yam-ammok ti bagik kas kameng ti gunglo iti panagdawatko iti personal nga innuman a manamnama a maipablaak.

IV. Liklikak ti agsurat iti salaysay, damdamag, sarita, daniw wenno nobela a makadadael iti pribado a reputasion malaksid no para iti pagimbagan ti dakdakkel a publiko. Kasta met a sipipingetak a mangipamuspusan a maibatad iti publiko dagiti rumbeng a maammuanda.

V. Diak itulok nga apektarannak dagiti personal a gagem wenno pagimbagan iti panangtungpalko kadagiti pagrebbengak; wenno umawatak wenno mangidiayaak iti sagut, kari, wenno sabali pay a pakairanudan a mabalin a mangikagay iti panagduadua iti integridad ti kinamannuratko.

VI. Diakto pulos tuladen wenno kopiaen ti sinurat ti sabali sa kalpasanna tagikuaek.

VII. Iti ania man a wagas, diakto pulos manglais, wenno mangtagibassit iti asino man gapu iti katatao (gender), pammati, relihion, prinsipio iti politika, kultural ken etniko a pakaibilangan.

VIII. Ibilangko nga inosente ti amin a tao iti ania man a krimen agingga a di pay kinedngan ti korte. Agan-annadak a mangusar iti nagan dagiti ubbing (minor) ken babbai a nairaman iti kriminal a kaso tapno saan met a di nainkalintegan a mapukaw ti natugawanda iti gimong.

IX. Diakto pulos maysaan wenno  gundawayan iti di maikanatad a wagas ti padak a mannurat.

X. Awatek laeng dagiti aramid a mayataday iti integridad ken dignidad ti kinamannuratko, pagturayek ti ‘linteg ti konsensia’ iti kanito a ti pagrebbengan a nayabaga kaniak ket makisinnupangil iti timek ti konsensiak.

XI. Agtignayak iti publiko wenno bayat ti panangtungpalko iti pagrebbengak kas mannurat iti wagas nga agtalinaed ti dignidad ti kinamannuratko. No agduaduak, kinadisente ti mangibagnos

kaniak.

XII. Tumulongak iti pannakataginayon ti dayaw ni mannurat babaen ti pannakaited dagiti mayannatup a pammigbig wenno pammadayaw a maibasar kadagiti agdama a paglintegan ti gunglo a nakaikappenganna.
 

      Umuna a panaglabsing ti kameng iti maysa wenno nasursurok itoy a kodigo, maipaayan iti pakdaar ken masapul a dumawat iti pammakawan iti publiko. Maikadua a panaglabsing ti kameng iti maysa wenno nasursurok itoy a kodigo, dagus a maikkat kas kameng ti GUMIL Filipinas ken saanton a mapalubosan nga agkameng iti nasao a gunglo.
 

Insagana ti ETHICS COMMITTEE:

Fernando B. Sanchez – Chairman
Guillermo I. Concepcion – Co-Chairman
Eliseo B. Contillo – Member
Freddie G. Lazaro – Member
Jovito F. Amorin – Member