Uray no nauyong dagita kidaymo
Mangted kenkat’ langan’ sairo
A saan met ngarud a kas anghel,
Bruha a nagmatat’ maka-ayayo,

Agrukbabak kenka, O dangnga,
Iti awan kaaspingna a rikna!
A kas iti panagrukbab
Ti padi iti rebultona..

Ti disierto ken kabakiran
Balkoten surayray a pinggol,
Ta utekmo nga addaan ugali
Kadagiti burburtia ken palimed.

Iti lasagmo umalingasaw ti banglo
Kas aglawlaw pagitugkelan insenso,
Ta kayawmo kas iti rabii
Nimpa a datdatlag ken naderrep.

Ah, dagiti gamud a kabirtudan
Awan maayda iti kinaellaymo,
Ketdi ammom ti apros
A mangbiag bagi a nalunos !

Kuminikin dagita patongmo
Manipud bukot inggat’ suso,
Agi-innapal dagiti pungan
A mapandagan kawilmo.

Sagpaminsan, tapno mapagustuan
Ta pungtot a di mailadawan,
Itedmo amin, awan mabuna
Dagiti kagatmo ken ungngo.

Rangrangkayennak, Simangko,
Kadagiti mangar-arit a garakgakmo,
Kalpasanna ditoy pusok iparabawmo
Dagiti matam a kas iti bulan kaamo.

Iti uneg dagiti sapatosmo a satina
Paddek dagiti dapanmo a kas seda
Ipustak ragsak awan kaaspingna
Panunot ken masakbayak aminda,

Ta toy kararua sikat’ angesna
Gapu kenka, silaw ken maris!
Kas maisabuag a darang
Iti saligemgemko ti Siberia!

VF’s footnote: “(* I used simangko for “ma brune”, a pet name given to a girl according to the color of her hair)”

(Virtual Friend’s translation of the poem “Chanson d’Après-midi” (“Afternoon Song”) by Charles Baudelaire from the original French version. VF says the translations in English are not as good as the original, and were not faithful to the real essence of the poem.  Ilocano translation is first posted in Mighty Rasing’s page in Facebook.—Sherma)