nakitak lidliday mo itay dungngo
uray la paapgesen nat barukong ko
pudno anya met maaramid toy nomo
ngem makibingayak ta sennaay mo
dinengdengngeg kot sansaning-im
siyakon agsagaba amin no mabalbalin

insadag mot sumaksakiten nga ulom
nakurapayen dati natadem nga kukum
naglumenen dagiti nasilap nga matam
impesen dagiti nalalapsat nga abagam
naundayen dagiti bitek nga agpasungad
kenni kurarawit agur-urayen ta arpad

manggeg kon tay lungogan nga aweng
ipulpul-oy angin ken nauneg a day-eng
petpetam dagiti imak; imam lumamiisen
makitak agarubos luwam pati siak met ten
idi bigla nagrissik dagiti matam, makasisilap
sa nariknak pudot ti init nakatuon toy matak