Da Joel B. Manuel, Sherma E. Benosa, ken Efren A. Inocencio dagiti napili nga umawat kadagiti umuna a tallo a gunggona, kas panagsasarunoda, iti Umuna a Prof. Honor Blanco Cabie Premio Iti Naisurat Iti Literatura Ilokana (Cabie PINILI)-Sarita Para Ubbing 2009.

Impangabak ni Manuel, premiado a mannurat ken officer in charge ti Banna National High School, Ilocos Norte, ti saritana a �Ti Salip Da Kalgaw Ken Burarog.� Pinangabak met ni Benosa, maysa met a premiado a mannurat a taga Nueva Vizcaya ken part-time writer iti National Commission for Culture and the Arts,�ti saritana a �Ni Anya Manilenya Ken Ni Balong Promdi,� idinto a pinangyalat ni Inocencio, maysa pay a premiado a mannurat ken Master Teacher 1 iti Quiling Elementary School, Batac, Ilocos Norte ti saritana a �Ti Manok Ni Andy.�

Dagiti naghurado: Juan Al Asuncion ti Sarrat, Ilocos Norte ken San Jose del Monte, Bulacan, chairman; Juan S.P. Hidalgo, Jr. ti Rosales, Pangasinan ken UP-Diliman; ken Reynaldo A. Duque ti Ciudad ti Candon, Ilocos Sur ken Alfonso, Cavite, agpada a kameng.

Awatento dagiti nangabak dagiti premioda a cash ken sertipiko ti pammigbig iti awarding ceremonies a maangay iti pagtaengan da Honor ken Rose Blanco Cabie iti Brookside Hills Subd., Cainta, Rizal inton Abril 5 iti daytoy a tawen. Maangay ti Awarding Ceremonies iti kalawasan ti anibersario ti pannakaipasngay ti ina ni Honor Blanco Cabie, ni dati a Francisca Toledo Blanco, maysa a biolinista ti Paoay, Ilocos Norte.� Dagiti premio: P5,000 (Umuna a Gunggona); P3,000 (Maikadua a Gunggona); P2,000 (Maikatlo a Gunggona). Makissayanto dagitoy iti 10 a porsiento ket maitedto iti Gunglo Dagiti Mannurat iti Metro Manila kas maiyataday iti immun-una a pakaammo ken pagalagadan nga inyetnag ti Pamilia Cabie.

Nairusuat ti Cabie PINILI (Cabie Award for Written Iluko Literature) idi Nobiembre 2008 kas proyekto ti Membership Committee ti GUMIL Metro Manila a katulongan a pangparegta kadagiti pluma ni mannurat nga Ilokano a mangikur-it kadagiti ababa a sarita para kadagiti ubbing.

Kayat ti Cabie PINILI a masukisok dagiti mannurat nga Ilokano daytoy a sukog ti literatura iti pammatina a maitag-ay koma daytoy a rupa ket ad-adda pay a mapabaknang ti kultura ni Ilokano. (Dadapilan.com version, with some insertions)