�

GAGANGAY LAENG A TSUPER NGEM TALLO A NAPEKLAN A BIRKOG TI IMPAPASKUANA

�

��� KUMKUMPASAN ni Norman Maglaya, 23, ti naparagsit nga ayug ti Paskua iti stereo ti taksina. Maragsakan iti kaadu ti pasahero nga agshopping. Tumuyutoyda iti Avenida Rizal ken Recto Avenue.

���� Pinara ti maysa a lalaki ni Norman iti batog ti Cinerama. Kadua daytoy ti asawa ken dua nga annakna. Nakakepkep ti ubing a babai iti kadakdakkelna a teddy bear. Nakaibarikes iti nangina a sinampaltog ti ubing a lalaki ken nagaruat iti kallugong ti cowboy. Agtawenda ngata iti innem ken lima.

���� Lumakayen ti lalaki a nakabarong. Agubanen. Natakneng ti langana iti napuskol ti sarmingna nga anteohosna. Ub-ubing nga adayo ti asawana. Mayat ti sukog ti patongna iti pantalonna. Kumepkep ti asul a tisirtna iti nasippukel a barukongna. Napintas koma no di napuskol ti make-upna.

���� Adu ti ginatgatangda. Dimsaag ni Norman ket linuktanna ti baggage compartment iti likudan ti taxi a pagikargaanda.

���� Sikakaranting ti ubing a lalaki a simmalpa iti sango. Nagtengngaan dagiti agassawa ti ubing a babai iti likud.

���� �Saan ho tayo, Sir?� sinaludsod ni Norman.

���� �Sa Sikatuna Village,� insamira ti lalaki ti nangisimpa kadagiti linaon ti paper bag a saksaklotenna.

���� Naragsakda, naisip ni Norman. Nalagipna ni Joy. Agsagsagana ti asawana iti Noche Buena itay pumanaw iti bassit nga apartment nga ab-abanganda. Dina koma palubosan nga agpasada. �Kakaisuna a Paskua,� kinunana. Ngem adda abalbalay a karina kadagiti dua nga annakda. Walking doll ti bilin ni Baby Joy, electric train ken ni Jonjon.

���� Naipatayab ti �I Saw Mommy Kissing Santa Claus� iti stereo ti taxi. Nagsipat ti ubing a lalaki iti abayna.

���� �Alam ko �yan!� Tinaliawna dagiti dadakkelna iti likud. Pinasurotanna ti kanta.

���� �Ay, naku. Natarabit dayta nga ubing ken di masmasleg,� kinuna ti ina. �Nalaing nga agtulad �ti kanta!�

���� �Uray kasla maip-ipit met nga ipes ti bosesna!� naggarakgak ti ama.

���� �Napintas met ti bosesna, sir,� kinuna ni Norman.

��� Dayta ti nangrugian ti naragsak a panagpapatangda. Naammuan ni Norman a padana nga Ilokano ni Mr. Baclig.

���� Executive ti dakkel a kompania idiay Makati. Tagala ti asawana ngem nasayud nga ag-Iluko.

���� Dinamag ni Mr. Baclig no dakkel met la ti mapaspasadaan ni Norman.

���� �No dadduma, Manong. Ngem no malasenka, kurang pay nga igatang iti yapuy. Nangruna no madadaelanak. Di umanay ti mapasadaak a pagpatarimaanko. Santo pay ti boundary.�

��� �Hmm,� nagtungtung-ed ni Mr. Baclig. �No kayatmo ti agtrabaho, umaykanto idiay opisinak no malpas ti Paskua. Uray ta kunam met a makatawen laengen sa agturposka iti civil engineering. Nasaysayaat met laeng no adda fixed a mabirbirokam iti inaldaw. Nangruna ket dumakdakkel ti pamiliam. Addanto payen gundawaymo a mangturpos iti kursom bayat ti panagtrabahom. Adtoy ti tarhetak.�

���� �Agyamanak unay, Manong,� di mailinged ni Norman ti ragsakna.

���� Sumrekdan iti nawatiwat a bassit a sungadan ti subdibision. Agaaddayo dagiti poste� a manmano ti adda silawna. Narasay ti balbalay. Kaleddaan ti agsumbangir ti kalsada. Underdeveloped pay laeng ti subdibison. Kas nasao ni Mr. Baclig isuda ti maysa a kaunaan a nagpatakder iti balay ditoy a nabayadanda ti loteda.

���� Pagam-ammuan, nasilawan ti taksi iti pagsikkuan ti agibar-ibar a lalaki a nagpatnga iti kalsada. Binaddekan ni Norman ti preno. Naganit-it dagiti pilid.

���� Bassawanganna koma ti lalaki ngem dua pay a lallaki a kasla aglanglanga a burangen ti rimmuar iti kasamekan. Nagkullayaw ni Norman idi paturongan ti nakakipis.

������Iddepem �ta headlights!�

���� Nagpalikud ti adda nakabarabad a puraw a panio iti pungupunguanna ken ti nagpatnga iti kalsada itay.

���� �Ano�ng ibig sabihin nito?� Agtukiad a rummuar ni Mr. Baclig idi guyoden ti adda barabad ti pungupunguanna. Ingguyod met ti kaduana ni Mrs. Baclig. Simmalipengpeng ti ubing a babai iti inana. Nagtalinaed ti mangpatpaturong ken ni Norman. Nakatanga ti ubing a lalaki iti abayna.

���� �Paskuaendakay� la bassit. �La, itedmon �tay aginaldomi!� Indugsol ti nakabarabad iti panio ti iggemna iti bakrang ni Mr. Baclig.

���� �No kuarta, awan. Ngem addad�ta likud dagitay ginatangmi�� Agpigpigerger ni Mrs. Baclig a nangkepkep iti anakna.

��� �Kapkapam, Pingol,� imbilin ti nakabaredbed iti panio.

���� Inukag ni Pingol ti wallet a naalana ken ni Mrs. Baclig. Nagmulagat idi makitana dagiti nabukel a sagsisingkuenta ken sagsasangagasut.

���� Pinanggep ni Mrs. Baclig nga agawen ti petaka. Inarrabis ni Pingol. Napadata ni Mrs. Baclig. Inwadag ni Mr. Baclig ti mangpatpaturong kenkuana. Dinarupna ni Pingol. Ngem nasiglat ni Pingol. Linisianna dagiti danog ni Mr. Baclig sana pinalek iti putan ti pistolana. Nadalupo ni Mr. baclig iti sakaanan ni baketna. Nagikkis dagiti ubbing a nangarayat iti amada. Inkasa ni Pingol ti paltogna.

���� �Dika rummuar!� imbugtak ti burangen ken ni Norman.

����� Pinagluganda ni Norman iti taksi. Nagtugaw ni Pingol iti abayna a sipapaturong ti pistolana. Iti likudan ti nagtugawan ti pangulo ken ti nakakipis.

���� �Ibueltam!� imbilin ti pangulo.

���� Tinaliaw pay ni Norman dagiti agama. Di pay nagsubli ti puot ni Mr. Baclig. Impayat ni Norman ti siliniador.

���� Idi agsikkoda iti EDSA, nasaripatpatanna iti side mirror ti umip-ipus a mobile car. Nakagin-awa. Pinaginayadna ti luganda ngem dinugsol ni Pingol ti bakrangna.

���� �Huwag kang magpapahalata!�

���� �Isikkom iti kanawan!�

���� Saan a sinaan ida ti mobile, umaw-awengen ti sirenana. Pagsarsardengenna ida.

���� �Bilisan mo pa!� Kasla isiwsiwetdan iti kalsada a rummuar iti Metro Manila.

���� Iti rear view mirror, nasiputan ni Norman ti panaginnarasaas ti pangulo ken ti nakakipis. Kiniddayan ti pangulo ni Pingol. Dakes ti nagparikna ken ni Norman idi ikasa ni Pingol ti pistolana.

���� �Ihinto mo!� naturay ti bilin ti pangulo.

���� Nagdesision ni Norman. Nangitanamitim iti ababa a kararag sana binaddekan ti siliniador idi umasidegda iti pagsikkuan, inawidna ti manibela iti kanawan sana giniddato a linettat ti lock ti ridaw. Inkidemna ti timmapuak. Nagtumbling. Inusarna dagiti naadalna iti karate school iti panagdissona. Ngem naawanan iti balanse ket naibatbat iti nalap-ok nga abaga ti kalsada. Natulitulid iti nauneg a kanal. Naitupa ti ulona iti natangken a banag.

���� NASISIRAP idi agmulagat. Di makagaraw. Kasla namalmalo ti bagina. Nakabitin ti maysa a sakana. Maibusen ti suero iti uluananna.

���� �Dok, nakapuoten!� kinuna ti nars iti sikiganna a mangal-ala iti pulsona.

���� Immasideg ti doktor. �Merry Christmas, Mr. Maglaya!� inkablaawna. �Komusta? Aniat� mariknam ita?�

���� Nalagip ni Norman ni Joy ken dagiti dua nga annakda. Nagur-urayda la ketdi idi rabii.

���� �Maudi a matandaanak ti itatapuakko iti agtartaray a taxi. Pasaherok ti tallo a hold-apper!�

���� �Good!� Naragsakan ti doktor. Di met la nakalog ti utek ti pasiente. �Adda ni Misismo ken dagiti annakyo dita ruar ken ti hepe ti polisia.�

���� �Pastrekenyo idan, dok,� kiniddaw ni Norman.

���� Simrek ni Joy ken dagiti dua nga annakda. Limseb dagiti mata ni Joy. Pinetpetanna ti dakulap ni Norman. Nagarubos ti luana.

���� �Merry Christmas, sweetheart,� inkablaawna. �Nagistayankan. Naimbag ketdi ta naitaraydaka ditoy ospital dagiti pannakabagi ti linteg. Napalalo a danagko idi umayda ipakaammo ti napagtengmo.�

���� Nagsaruno da Baby Joy ken Jonjon a nangagek ken ni Norman. Marmaratubbog met dagiti matada.

���� �Merry Christmas, Mama, kids� Please, �Ma, dika agsangit. Kitaem dagita ubbing, maluyaanda metten, sika! Cheer up! Agyamantayo iti Dios!�

���� Simrek ti butiog a hepe ken maysa nga imbestigador.

���� �Merry Christmas, Mr. Maglaya,� indiaya ti hepe ti imana.

���� Impakaammo ti hepe a notorious hold-uppers dagiti tallo a nakaenkuentroda idi rabii. Natay ti panguloda iti nakapasamakan ti aksidente. Adda iti ward dagiti dua a pasurotna. Pagtagtagiammuan no makalasatda.

���� �Ni Mr. Baclig, tsip, komusta?� nalagip ni Norman.

���� �Nayospital met ngem saan a grabe. Umayto kano ditoy. Paidanonna ti panagyamanna.�

���� Adda nagtugtog iti ridaw.

���� ��Mangan no isuda dagitan,� kinuna ti hepe.

���� Simmangpet ni Mr. Baclig. Nabendaan ti ulona. Inkuyogna ti pamiliana.

���� �Merry Christmas, Norman! Umaykami agyaman ken mangkomusta iti kasasaadmo�� inyebkas ni Mr. Baclig.

���� �Nasayaat met, Manong. �Suna laeng ta mabayag pay ngata sakbay a makatrabahoak,� insungbatna.

���� �Panunotem ketdi ti yiimbagmo daras. Laglagipem �di tulagta. Ken ammom kadi a bannuarka?� Impakita ni Mr. Baclig ti paulo a damag ti aginaldaw a pagiwarnak.

���� �Ken saan laeng a dayta,� insengngat ti hepe. �Adda naituon a dakkel a gatad iti ulo ni Pedong Pasiklab, ti pangulo dagiti hold-upper, a maipaay iti makatiliw, sibibiag wenno natayen. Sika ti umawat iti dayta a gunggona gapu iti inaramidmo a nakaigapuan ti pannakaipasulimi kadakuada!�

���� Kasla di mamati ni Norman iti nangngegna. Nakalua iti ragsakna. #

��

Naipablaak iti BANNAWAG idi Disiembre 26, 1977.

Copyright 2008 by ANSEL D. CARGO.

All Rights Reserved.