i
agdiskurso no kua dagiti ruting
iti entablado dagiti kinelleng
makilinnaaw kadagiti malnoris
a protesta ti gawat
dagiti panaas nga andingay
dagiti bulbullagaw a kari
ti pagilian nga inarado ken sinuyod
dagiti mannalon ti bisin

makitinnawarkami latta
iti tiendaan dagiti sainnek
iti baro a barayti ti ayat
nga ipalatak no kua ni ama lakay
iti malakaniang ti kaasi
a pakilantipan ti namnama
ti aginnala a pitak ken ruting
ket mainaw ti baro a rasaw
dagiti bagyo ken tikag
ta kalpasan nga agtigab dagiti kinelleng
kumaramut dagiti ramut kadagiti kari
ken rebolusion dagiti arrabas
ay, mataraken dagiti bunubon

ii
makilinnangsot ti angaw ken ellek ken katawa ti layus
no kasta a kaddarato nga arasawenda ti napalsian
nga isem dagiti naalisan a gipi ken natay
a bugi dagiti pagay, makimaroda kadagiti darudar
dagiti kabus, ket itaepda no kua
dagiti daradara nga ibo ti saraaw

makiinnangawkami latta kadagiti sangit sardam
ken umbi dagiti agay-ayam nga ubbing
iti paraangan ti bisin, makilinnemmengda no kua
kadagiti padaya dagiti sililisay
a tigab dagiti pingggan, naynay nga idalungdong
ni ina baket ti panes-eksodo dagiti riniadan a dapan
ket imansayagna ti manto ti bullalayaw
kadagiti bangkay a disierto ti tengnga a daya, iti laud
itugkelna ti krus a darepdep ti ubas ken mansanas
ay, daradara ti isem ti darudar

iii
madarugsoy no kua ti ling-et
dagiti itreserta a saem dagiti ginapasta
a katawa ti inutang nga abono, agkudaap
no kua dagiti kumpayenta
a ngipen ti bisin manipud kadagiti pinuon
dagiti saning-i ti nakem ti naudatal
a namnama dagiti ibuyogta a bulibol
dagiti epppes nga ayat

makipilata latta no kua
iti pammumpon dagiti balikas
manipud kadagiti dung-aw ti daniw
ken dagiti daradara a kumpay
ken rakem a rumkuas kadagiti gemgem
dagiti bisin— sukalenta ida iti iwarsim
sangarakem nga innapuy a daton
dagiti ngilinenta nga ulimek saem-ritual

arakupen latta ti alipugpog dagiti sangit
ti immalsem a daga— agpalpalama iti ayat
ay, kuppikuppit ti sangit dagiti kiraos

.
iv
itugkelko no kua ti padeppa
ti bambanti a reporma ti daga
a sandi ti angkatenta a lunod
dagiti imarota nga angin
kadagiti tabbaaw dagiti ibuyogta
nga eppes a dawa dagiti kinelleng

agpanes ti dung-aw ti daradara
a sennaay dagiti kaldero
ken sangit dagiti dalikan
a pinakyaw dagiti negosiante ti bisin
a kinontrata ti presidente
ken dagiti senador a bumbumsog iti tigab
dagiti bodega a namutittit
kadagiti awanan nagan nga ulpit
ken sanaang ken saem
dagiti dawa a naisalda
iti utang dagiti inirikan a lallay
ay, eppes ti tigab dagiti irik

v

burakek latta no kua ti ulimek dagiti bingkol
nga inkuduag sarapa ken sinaratsat palang
sarunuenta ti al-al ni sawak iti murdong ti witiwit
ta adda kari tunggal gamal ti iteppelta a bunubon
iti tunggal limbang ken takap
adda di matay a karit iti ungto ti tambak
a pangitungpalan ti rugi ken gibus ti bisin
adda latta sirnaat ti kuyem ti sangaapuyan
a katimbeng ti agmalem a saraaw ti dalikan
ken rungaab ti ugaw a pagbagasan
adda latta kussuoy ti nakem tunggal dumteng
dagiti kimat-dulluog ket makitagnawa dagiti arado
ken suyod a makigubal latta kadagiti saplit
dagiti piskel nga inaradas ti utang
dagiti kaldero nga inlunod ti kuton
dagiti dawa nga intayab ti manok
ken inyanud ti rugso ti arak iti entablado
ti lamolamo ken mannala latta a bisin
ket sapulenmi latta no kua a sapulen
dagiti eksodo ti daradara a darudar
ken panagsubli dagiti riniadan a dapan
ken kapuyo ti kinersang a dakulap
ta ibuyogmi ti eppes a bulibol ti daniw
ay, agsala latta dagiti arep-ep iti lung-ay ti angin.

.

Copyright 2008. Daniel L. Nesperos
All rights reserved.

.
Posted with permission from the author.

.