Bilingual Pen | Maika-10 a Salip iti Daniw ti AVAIL

Maika-10 a Salip iti Daniw ti AVAIL

November 26, 2008 by Bilingual Pen filed under Contest | 100 views

Ipalagip ti Secretariat ti Abuan-Valdez Awards for Iluko Literature (AVAIL) kadagiti mannaniw iti Iluko nga interesado a makisalip iti maika-9 a salip iti panagsurat iti daniw ti AVAIL nga aggibus ti nasao a salip iti Peb. 28, 2009.

Dagiti pagannurotan ti salip, kas kinuna ni B. Baldwin M. Valdez ti AVAIL Secretariat:

1. Silulukat ti salip kadagiti amin a mannaniw iti Iluko, iti Filipinas ken iti ballasiw-taaw, malaksid kadagiti nangabaken iti Umuna a Gunggona iti nasao a salip.

2. Agatiddog ti daniw iti di ab-ababa ngem 20 a linia ngem di met nasursurok ngem 28 a linia. Maysa laeng a daniw ti mabalin nga isalip ti kada mannaniw. Masapul nga orihinal ken di pay naipablaak ti pakisalip iti uray ania a magasin wenno pagiwarnak.

3. Siwawayawaya ti mannaniw a mangpili iti topikona. Maikompiuter wenno maimakinilia ti daniw iti uppat a nalawag a kopia ken maipatulod iti di naladladaw ngem iti Peb. 28, 2009 itoy nga adres: The AVAIL Secretariat, P.O. Box 15, Alicia, 3306 Isabela.

4. Awan nagan ti mannaniw (pudno wenno parbo) nga agparang iti daniw. Mapakuyogan met ti pakisalip iti narikpan a sobre a naglaon iti pudno a nagan ti mannaniw, paulo ti daniw, ladawan (2” x 2”), ken biodata. Iti rabaw ti sobre, isurat ti paulo ti pakisalip a daniw.

5. Karbengan ti esponsor ti pasalip ti mangilibro kadagiti daniw wenno mangipablaak kadagitoy iti pilina a magasin.

6. Dagiti gunggona: Umuna, P1,500.00 ken plake; Maika-2, P1,250.00 ken sertipiko; Maika-3, P1,000.00 ken sertipiko; Maika-4, P750.00 ken sertipiko; ken Maika-5, P500.00 ken sertipiko. Mayawatto dagiti gunggona bayat ti Komperensia Nasional ti GUMIL Filipinas iti Kalgaw 2009.

Ni Baldovino Ab. Valdez, presidente ti GUMIL Filipinas, ti esponsor ti nasao a salip kas ruknoy dagiti appoko daydi Justa S. Abuan ti Asingan, Pangasinan ken daydi Baldomero F. Valdez ti Solano, Nueva Vizcaya kada Lola Justa ken Lolo Baldomero.

(Naadaw iti Gumil Metro.)