Bilingual Pen | 7 ti aglalaban iti kampeonato iti Saribitniw

7 ti aglalaban iti kampeonato iti Saribitniw

November 26, 2008 by Bilingual Pen filed under Contest | 87 views

Pito a mabigbig a dumadaniw, bumibitla ken sumasarita ti aglalaban iti kampeonato iti Saribitniw (Sarita-Bitla-Daniw) a maangay inton Noviembre 30, 2008 iti La Union National High School auditorium iti Ciudad ti San Fernando, kas impakaammo ti Sir Pelagio Alcantara Development (SPADE) Foundation nga akinproyekto itoy.

Kuna ti SPADE a dagitoy ti napili a finalists iti ragup ti 17 a nakisalip ket maammuanto dagiti mangabak kalpasan ti panaglalabanda iti oral delivery iti dayta naikeddeng nga aldaw a panglukat iti Maika-2 nga Ilokano Literary-Cultural Festival.

Dagiti aglalaban: Prof. Honor Blanco Cabie iti Metro Manila; Prof. Clarito de Francia iti University of the Cordilleras iti Baguio City; Prof. Jaime Raras iti University of Northern Philippines Candon Campus; Atty. Sinamar Sanchez ti Pangasinan; Errol Abrew, editor ti Regional Diaryo iti La Union; Guillermo Concepcion, publisher ti Vigan Chronicle a nakabase iti Laoag City, Ilocos Norte; ken Henry Lagasca ti PIA Rehion I iti San Fernando City.

Dagiti premio: P10,000 ken sertipiko, umuna a gunggona; P7,000 ken sertipiko, maikadua a gunggona; P5,000 ken sertipiko, maikatlo. Addanto pay pangkonsolasion a gunggona para kadagiti tallo a sumaganad a minor winners.

Kadua ti SPADE ti National Commission for Culture and the Arts (NCCA) a nangisayangkat itoy a salip.

Ni La Union Gov. Manuel C. Ortega ti kangrunaan a sangaili ken agbitla. Mangtedto met iti mensahe da UP Baguio Chancellor Priscilla S. Macansantos, Vice Head ti National Committee on Literary Arts ti NCCA; Director Washington M. Agustin ti TESDA Rehion I; ken Dr. Consolacion L. Aquino, prinsipal ti La Union National High School ken presidente ti GUMIL San Fernando City.

Itoy nga okasion nga agsapatanto met dagiti opisial ti GUMIL San Fernando City iti sango ni retirado nga RTC Judge Joven F. Costales, umuna a presidente ti GUMIL La Union.

Ken maitedto met ti sertipiko dagiti nangabak a taga-La Union iti salip nga innaduan iti urnong a BANNAWAG – da Odilon Arizala ti Bauang ken Fernando Negrillo ti Luna, salip nga inesponsoran ti GUMIL Oahu, ti gunglo dagiti mannurat nga Ilokano iti Oahu.

Iti maikadua nga aldaw, Deciembre 1, maangay met ti Ilokano Literary Book Exhibit agraman ti on-the-spot poetry writing and reading contest para kadagiti estudiante ti kolehio ken ti literary quiz bee para kadagiti agad-adal iti haiskul.

Mairaman iti eksibit dagiti antolohia iti sarita, daniw, novela ken drama dagiti mannurat nga Ilokano ken dagiti napili a gapuananda a naipablaak iti BANNAWAG manipud idi 1946 agingga iti agdama. Kangrunaan kadagitoy dagiti immuna a premiado a sarita iti orihinal a langada, kas naipablaak iti BANNAWAG idi 1961.

Daytoyto ti panggibus iti pannakarambak ti Maika-2 nga Ilokano Literary-Cultural Festival a manamnama a dar-ayanto met dagiti mannurat nga aggapu iti nadumaduma a deppaar ti Filipinas ken dagiti espesial a sangaili nga idauluan da Tito ken Dureza Aquino a mangibagi iti Model OFW Family iti Rehion I idi 2005.

(Naadaw iti DADAPILAN)