adu, adu, ti karbengam, bassit a tao.
kas koma iti panaganges uray addaka’t karsel,
kas koma iti panagdildil asin no maipit ti sueldom.

karbengam, karbengam uray ti agarapaap.
daytay, ngay, agum-umaka nga agngutngot iti litson,
daytay maminsangapuloka a mangan iti maysa nga aldaw,
daytay agsalsalsalka uray madama’t bagyo ta batot’ taengmo,
daytay ikarkararagan ni cardinal sin ti kararuam,
daytay kain-innapirmon’ gloria, kainumam ni mike arroyo,
daytay nakamasingganka a pagkurkurnuan dagiti nengneng,
daytay naka-pajeroka a mangitulod ken ni katya santos iti langit…

ngem dimo la namnamaen, a, a pumudno dagita nga arapaapmo –
no dimo kayat ti masaktan.
ta dagiti la dios akinkarbengan iti ar-arapaapem.
ken nailet ti langit, isu a bassit laeng, mapili laeng ti mapastrek –
kinapudnona pay ketdi, no dyip koma, tao aminen a bubonganna!

ngem bay-amon, uray ta dayta met lat’ kaisuna a mayimut kenka.
adu ket adu ket nagadu ti karbengam ‘itoy a daga.
uray agbekkelka – no naumakan iti murkat – karbengam latta!