NAKASAGANAN A MAPAN MAKIPASKUA IDIAY ILIDA IDI PAGAMMUAN TA SIMMULPOT NI STA. CLAUS A KAARNGI NI JOLLIBEE KET RINUGIANNA A BURAEN DAGITI COMPUTER FILES

 

MAKADOMINGGO laengen, Paskuan. Magagaranak nga agbakasion idiay Bacnotan a nakayanakak. Sangapulo a tawen a diak nagawid ta makumikomak iti trabahok. Siak ti boss iti IT (Information Technology) Department ti kompania a pagtrabahuak. Idi kakaskasarmi ken ni baketko ti naudi a panagawidmi a panangyam-ammok kenkuana kadagiti kakabagiak a di nakaatendar iti kallaysami ditoy Manila.

            Nakaplanon ti panagawidmi. Nakaimpaken ni Marlyn kadagiti masapsapulmi. Nakasagana metten dagiti gargaret dagiti dua a tsikitingmi. Maayatan la ketdi ni Anti Silay, inaudi a kabsat ni nanang  a makakita kadagitoy dua a naalikuteg a kakaanakanna. Walo ti tawen ni Felice Anne nga adda iti maikadua. Tallo ti tawen ni Nico Paolo a buridek.

            Manipud pay idi mapagnaminganmi ken ni baket ti panagbakasionmi, panay kantiawna ta no mabalin, guyodek dagiti aldaw tapno makaawidkamin. Magagaranak kadagiti gapu a kayatko a dumteng a dagus ti petsa ti panagawidmi.

Umuna, tapno maipakita ken mailastogko ti pamiliak kadagiti kakabagiak, gagayyem ken barkadak. Idi naudi a panagawidmi arig lumsot ti mata dagiti nakakita ken ni baketko. Asino aya ti mangipagarup a makaasawa iti nalapsat a mestisa daydi agpaspastor ti nuang ken agmalmalem iti kainaran. Namindua a nag-Miss Batangas ni baketko idi kabambanuaganna. Ita, dua a nabun-as a tsikiting ti ukodko. Pang-Miss Bacnotan ti inaunak ken guapito ti buridekko.

Maikadua, kayatko nga ipangas ti kabarbaro a kotsek iti class re-unionmi ti high school iti kaaldawan ti Paskua. ‘Simbolo ti ‘yaasenso,’ kunada man.

        Ngem ti maikatlo ti agpaypayso a gapu a kasla masinsinit ti ubetko nga agbakasion. Nadamagko nga agawid manipud idiay Amerika ti dati a nobiak. Umay kano makipaskua segun iti e-mail ti kabsatna a naawatko. Kunak no ni Joy ti makatuloyak. Sangapulo ket uppat a tawen nga agayan-ayatkami. Ngem husto ti kunada a manmano ket narasay ti agkatuloyan iti atiddog nga engagement ta bumaaw ti relasion a kas iti napasamak kadakami. Ammo ni baketko ti maipapan ken ni Joy. Awan ti inlimedko kenkuana. Ngem dina ammo nga isu ti maysa a gapu ti ayatko nga agbakasion. Kuriosoak laeng a makakita no anian ti itsurana. Ken kayatko man a  tingitingen ‘toy riknak ta agrikab latta ‘toy barukongko no madakamat ti naganna.

        Nasinga ti panagar-arapaapko idi aguni  ti cellphoneko. Adda baro a message a simmangpet. Kasapulandak idiay Tektite Bldg. a masarakan iti Ortigas Complex a ‘yan ti Marketing Office ti kompaniami.

Addaak iti Quarry Plant ti kompaniami ditoy kabambantayan ti Angono, Rizal. Nadumaduma a sukat ti aggregates wenno bato dagiti produktomi. Simple laeng ti proseso ti produksion dagiti produktomi. Umuna, mulaanda iti dinamita ti paset a yan ti natangken a bato wenno basalt iti kasla inagdan-agdan a sidiran ti bantay. Pabettakenda dagiti dinamita. Ikarganto met ‘tay back hoe dagiti kakasla lakasa a bato wenno boulders kadagiti agur-uray a dump truck.  Itulod dagiti dump truck dagiti kargada iti crushing plant. Ditoy a magiling dagiti boulders iti agduduma a kadadakkel a mausar iti nadumaduma a kasapulan iti konstruksion.

        ‘Problema manen daytoy,’ naisipko idi patpatarayekon ti kotsek a mapan idiay Tektite Bldg. Basta umawagda iti emergency meeting problema ti gapuna.

       

PUDNO ti atapko. Kompleto dagiti manager iti nadumaduma a departamento a nadanonko iti uneg ti boardroom. Ad-adda a makapa-alarma ti kaadda ni Mr. Francisco Sanchez III, ti Kastila a presidente ti kompania. Napudaw ken natayag. Natundiris ti agongna a bagayan ti napuskol ti gradona a sarmingna. Nakatugaw iti makannawanna ni Mr. Arleo Santos a general manager. Dakkel a lalaki ken nalukmeg ni Mr. Santos. Naturay ti panagsasaona. Tinurongko ti bakante a tugaw iti abay ni Mr. Santos.

         “Norman, adda dakkel a problematayo,” tinaliawnak. Adda inruarna a papel manipud iti brown envelope a namarkaan iti confidential.

 “Sir, ibasak kadi kadakuada amin wenno para iti impormasion laeng ni Engineer Dacanay?” dinamagna iti presidente.

            “Please read it. It is for everybody!” insungbat ni Mr. Sanchez. English ken Espanol laeng ti masaona ngem maawatanna ti dadduma a lengguahe.

        “Palubosandak a mangbasa ‘toy surat a naiturong iti presidentetayo.” Inrugi a binasa ni Mr. Santos ti surat. “Dear Mr. Sanchez. Umuna, kablaawankayo iti naimbag nga oras. Maysaak a mangisaksakit iti kompania isu a kayatko nga idanon kadakayo ti maysa a kritikal a situasion a mabalin a mangparalisa iti operasion ti intero a kompania manipud iti Disyembre 24 agingga iti umay a baro a tawen,” impalawlaw ti GM dagiti matana iti ummong a nangrugi nga aganabaab kadagiti agduduma nga espekulasion.

“Saan a palimed a fully computerized ti kompania,” impigsa ni Mr. Santos iti panangituloyna. “Adda agpanggep a mangsabotahe iti network ket iti ania man nga oras bulosanda ti Christmas Bug a mangdadael iti operating system ti server ken mang-erase amin a file a naka-store iti hard disk. Mabalin nga aggapu iti ruar, posible a manipud iti Internet wenno manipud iti maysa a terminal iti Wide Area Network wenno WAN. Ngem mabalin met nga aggapu iti Local Area Network wenno LAN.  Naggapu ken ni Anonymous,” inggibus ti GM. Immanges iti nauneg a nangkupin ken nangisubli iti papel iti uneg ti envelope. “Anonymous. Saan nga imbaga ti nangipatulod no asino ngem dakkel ti pammatik a maysa nga empleado wenno kostumer!”

        “Saan ngata nga agang-angaw wenno mamutbuteng laeng ti nagsurat?” insengngat ni Ver Acuna, ti agkalbon a Personnel Manager. Gimmilap ti lulonanna a natupar ti lawag ti fluorescent lamp.

        “Mabalin a wen. Ngem mabalin met a saan. Awan ti makaibaga. Ngem nakasaganatayo kadi no agsardeng ti operasiontayo no sumippit dayta a Christmas Bug?” inamad ni Mr. Santos. “Panagkunak, ni Norman ti makasungbat kadagitoy a saludsod.”

“Okay, Dacanay, this is your expertise. Please, brief us what is this all about; its impact to our business and the solution to avoid great havoc to our organization!”  binilinnak ti presidente.

        “Sir, segun iti linaon ti surat, ababa unay ti panawen a nabati tapno maisaganatayo ti agdama a sistema. Saan a kas iti daydi millennium wenno Y2K bug a pinadaanantayo idi sumangbay ti tawen 2000.” Inukradko ti surat. “Disyembre 18 ita. Makadominggo pay. Ngem uray kaskasano adda warning ti idadateng daytoy a Christmas Bug. Saan a kas iti daydi Love Bug nga awan ti nagsuspetsa a nanglukat kadagiti e-mail a napauluan iti ‘iloveyou’. Tallo nga aldaw a naparalisatayo. Agarup makabulan sakbay a nakarekobertayo. Kritikal dagiti reporttayo iti panagserra ti tawen no tamaannatayo daytoy a computer virus!” impakaammok.

“Tallo ti mabalin a serkan ti computer virus. Umuna, babaen ti Internet a kas iti Love Bug a nakaporma iti e-mail. Dakkel ti posibilidad a luktan dagiti computer usertayo ta kas iti Love Bug maengganyoda a kitaen ti linaon ti mensahe a ‘merrychristmas’ a kas iti ‘iloveyou’. Maikadua, babaen ti network. Maysa laeng a terminal iti WAN, dagiti adda ditoy Tektite ken ti satellite officetayo idiay Pangasinan wenno iti LAN, dagiti adda idiay Rizal office ti maaccess ken masaksakan iti diskette a naglaon iti virus…krek!” immuestrak ti panangputedko iti tengngedko.

        “Ania dagiti precaution ken procedure nga isaganatayo tapno malapdantayo dayta a Christmas Bug?” inukas ni Lito Mendoza a  maintenance manager ti dalikepkepna.

        “Umuna, masapul a madis-able amin a diskette ken CD drive dagiti amin a terminal. Maikadua, awan ti manglukat iti e-mail a di ammot’ naggapuanna. Maikatlo, sukatan amin a password!”  insungbatko.

 “Nasurok a sangagasut dagiti terminaltayo. Kasano ti kapardas a maaramidyo dagitoy?” sinaludsod ni Mr. Santos.

 “Tallo nga aldaw ti kabiitan. Makadominggo ti kabayagan, sir,” insungbatko.

        “Agdouble timeka, partner. Amangan no di matuloy ti bakasionmo,” inyangaw ni Ver Acuna idi rummuarkami iti boardroom. Ammona ti panagbakasionko ta nakapag-fileakon iti vacation leave manipud iti Disyembre 24 agingga iti baro a tawen.

“Wen ngarud, maunsiyamin sa pay ti nabayag a sinaganaak!” insanamtekko.

 

MINITINGKO a dagus dagiti staffko idi makasubliak iti opisinak. Impakaammok ti sangsanguenmi a dakkel a problema. Operation: Christmas Bug ti impanaganmi iti nadumaduma nga aktibidad nga aramidenmi a panglapped iti didigra nga isangbay ti computer virus.

Napigsa ti awis ti panagbakasionko. Masapul a maipamuspusak ti pannakalpas ti Operation: Christmas Bug iti kabiitan a panawen. Matalekko amin dagiti taok. Nalaingda kadagiti liniada. Inawagak dagiti superbisor kadagiti tallo a section ti IT.

“Arnel, idis-ableyo kadagiti taom amin a diskette drive ken CD  drive dagiti terminal ditoy main office. ‘Ton malpasyo ditoy, isublatyo dagiti adda idiay Tektite ken idiay Pangasinan,” imbilinko. “Siguraduem nga awan ti makabalin a mangisubli kadagitoy agingga iti adda pangta ti virus,” innayonko.

        “Sige, boss. Ngem usarenmi koma ti van a servicetayo iti ipapanmi idiay Pangasinan,” kiniddaw ni Arnel.

Nagtung-edak.

Ni Arnel ti superbisor ti grupo ti technical support. Maysa a computer engineer. Tallopulo ket pitona itay Hunio. Lima a kadapan ken dua a pulgada laeng ti tayagna ken kalkalainganna ti pammagina. Sangapulo ket lima a tawennan iti kompania. Kabisadona dagiti terminal ken server ta mamindua iti makabulan ti preventive maintenance dagitoy.

“Erik,” binaw-ingak ti bading a superbisor ti Programming. “Rugianyon nga i-configure kadagiti batam dagiti terminal tapno masukatan dagiti password. Ngem unaenyo ti server. Kitaenyo laeng a saan a madisturbo dagiti end user tapno saan a maladaw ti financial statement nga isumitirtayo kadagiti board of directors.”

        “Sir, masapul a sukatantayo dagiti anti-virus software. Adda baro a bersion a rimmuar itay napan a bulan. Uray kaskasano makatulong daytoy,” nalamuyot ti panagyibbet ni Erik.

        “Good suggestion, Erik! Irequestmon idiay purchasing. Markaam iti rush tapno maalayo a sigud.” Insamirak a pirmaan ti gate pass ti van nga usaren ti grupo ni Arnel a mapan idiay Tektite sadanto dumaw-as idiay Pangasinan.

 

        Napudaw ngem narapis ni Erik. Computer Science ti nalpasna. Nataytayag ngem ni Arnel iti tallo a pulgada. Lima a tawennan iti departamento ken adun ti kontribusionna iti grupo. Saan a nakaskasdaaw nga isu laengen ti baro iti grupo gapu iti personalidadna.

        “Jerry, siguraduem dagiti back-up. No mabalin maminduakayo nga agback-up iti inaldaw manipud ita. Nayonam met ti kopia. No dua iti agdama, aramidem a tallo tapno makasigurotayo iti napartak a recovery no bilang matamaantayo,” kinitak ni Jerry, ti superbisor ti operations.

        “Boss, masapulmi ti dua a kahon ti magnetic tape. Maysa a kahon ti floppy diskette ken duapulo a compact disk,” inyawat ni Jerry ti requisition slip tapno pirmaak.  Ni Jerry ti kabayagan nga staffko. Makatawen ti baetmi a simrek iti kompania. Duapulo a tawenkon iti kompania. Makunak a siak ti nangpadakkel iti departamento ti IT. Idi sumrekak, section laeng ti grupok iti accounting department. Nangrugiak a computer programmer. Civil Engineering ti nalpasko ngem  nagustuak ti IT ta adda ditoy ti karit ken nangatngato ti sueldo. Iti kursok, pasdek ken rangtay dagiti idesignko. Ditoy, dagiti sistema ken programa a mangpaandar ken mangbilin  kadagiti computer no ania ti masapul nga aramidenda a kritikal iti negosio ken dadduma pay a pagsiriban dagiti yaramidak iti design ken analysis.

Accounting ti nalpas ni Jerry. Maskulado a kayumanggi. Kanayon a nangato ti pukisna. Naayat nga agsuot iti khaki a pantalon. Ang-angawek a bagayna ti agpulis.

 

IMPADAMAGKO iti kaingungotko ti computer virus a padpadaananmi iti karabiyanna.

“Ania ti kunam, lakay, bug? Gumatangkat’ adu a baygon ket spriam amin a computeryo. Kitaek man no makasippitda pay!” inyangawna. Naangaw a talaga daytoy better halfko. Agsungani ti ugalimi. Natalna ken seriosoak.  Galawgaw ken managangaw. Mamatiak san ‘tay pagsasao base iti prinsipio ti magnetismo  nga “opposite poles attract each other”.

Sagpaminsan, agbanggakami met. Natural ti agassawa. Aglinnaawkami pay no kua iti uneg ti kotse. Ngem napagkaysaanmi a saan a rumbeng a makita wenno mangngeg dagiti ubbing ti panagapami. Kalpasanna, labinglabing kami manen iti tumunggal maysa.  Awan ketdi ti agdinisso ta parehokami a propesional. Superbisor iti maysa a multinasional a kompania nga agdait ken aglako kadagiti akin-uneg nga aruaten dagiti babbai ni baket.

“Puroka kalokuan. Ammom kadi a pespesek ti utekko tapno masolbarko a dagus daytoy tapno matuloy ti ipapantay’ pannakipaskua idiay La Union?” Tinapayak ti mugingko. “Ammom met a mail-iliwak met kadagiti kakabagian idiay.”

        “Ow, adda pay siguro sabali a kailiwmo!” insutilna.

        ‘Bulls-eye!’ nakunak iti bagik. Diakon nagtimek. Ngem daytoy pay ti maysa a galad ti baketko a magustuak. Saan a selosa. Palibhasa makitkitana met ti langana iti sarming nga awan pay iti kikitna dagitay agpatpatsarming a kolehiala kaniak dita sungadan ti subdibision no rummuarak iti bigat. Nupay ammok met a maatrakarda laeng iti baro a Civic a luganko, tumartarabangak man no isemandak iti nakapigpigket. Nalawag a makitak ida ta diak pinaikkan iti tint ti sarming dagiti tawa ti kotsek tapno makitadak iti uneg. Guapoak kano no addaak iti likud ti manibela ti baro a kotsek.

 

        DIAK nakaturog iti dayta a rabii. Agwerret ti panunotko no ania ti strategy nga ipakatko tapno ma-shortcutko ti pannakalpas ti Operation: Christmas Bug. Masapul a leppasenmi sakbay ti eskediul a panagawidmi idiay La Union. Ita, medio agduaduaak no makayami a leppasen dagiti aktibidad nga ineskediulko agingga iti Paskua. Sakbay a makaturogak adda simmiplot nga idea iti utekko. Plinanok ti aramidek iti kabigatanna.

        Sinapak ti simrek iti opisinak ti kabigatanna. Simrekak iti kuarto ti technical support section. Eksakto iti planok idi makitak ti di pay nagaraw a reserba a server. Pinagatangko idi sagsaganaanmi ti delubyo nga ipagteng ti Y2K bug. Inrekomenda ti Y2K commission ti gobierno idi makitada a maladawen ti compliance remediation nga impakatmi iti agdama a server nga ar-aramatenmi. Ngem nakalusotkami isu a dimi nausar ti reserba.

        Binagkatko ti reserba a server. Impanko iti kuartok. Sinublik dagiti CD a pang-install iti OS wenno operating system ken dagiti applikasion a kasapulan iti agdama a network set up. Medyo mabayag ti formatting ken installation. Abutenna ngata iti nasurok a maysa nga aldaw isu a rinugiak a dagus tapno irestorekonto laengen dagiti back up ni Jerry a masterfile ken transaction files.

       

        DISYEMBRE 23. Maysa laengen a turog kunkunak idi malagipko ti pannakipaskuami idiay La Union. Panggepko ti aghalf day tapno makainanaak. Innem agingga iti pito nga oras nga agdriveak iti kabigatanna. Nalakaakon a maktangan no adayo ti biahe. Saan a kas idi kabambanuagak a deretso a pito wenno walo nga oras nga agdriveak. Awan sardeng dayta no agmaymaysaak. Malaksid no adda kaduak a madaras nga agisbo iti dalan a pakataktakan ti biahe.

        Iduldulinko dagiti wara iti lamisaanko idi umanangsab a simrek ni Claire, ti computer operator a nakadestino iti terminal idiay warehouse.

        “Sir, sir… kua, ‘diay computerko adda rimmuar a Santa Claus nga adda payakna. Kaarngi ni Jollibee!” dina masursurotan dagiti balikasna. “Idi kuan nakadispley iti screen ti maysamaysa a pannakadelete dagiti files iti hard disk. Pati OS tinamaan. Diakon maaramat.”

Diak pay nasungbatan ni Claire idi agsasaruno a simrek dagiti end user iti accounting department. “Sir, na-virus dagidiay computermi. Kasla immasuk dagiti linaonda!” Kas iti imbaga ni Claire, insalaysayda nga immuna a naidispley ti ladawan ni Santa Claus a kaarngi ni Jollibee. Simmaruno ti nakadispley a pannakabura dagiti files.

        “Dimtengen ti Christmas Bug!” nayesngawko.

“Aniat’ kunayo, sir. Ammoyo a mapasamak daytoy?” nagmulagatda a nangkita kaniak.

“Wen,” insungbatko. Ket insalaysayko ti preparasion ti IT Department a panglapped iti virus. “Isuna laeng a nasapsapa ngem iti namnamaenmi a petsa. Intono bigat pay koma ti rugi ti countdown agingga iti baro a tawen. Isu a di pay nalpas ti preparasionmi,” impakaammok.

        “Sir, kasanon. Ania ti aramidentayo. Nakadepende amin iti computer dagiti data ken impormasion a masapulmi tapno maaramidmi dagiti reportmi,” inreklamoda.

        “Kitaek no ania ti maaramidko. Agsublikayon kadagiti lamisaanyo. Mitingek pay dagiti taok.  Pakaamuankayo iti kabiitan a panawen. Amangan no masapul a rugianyon ti agmanu-mano kadagiti reportyo,” inyisemko.

        “Sir, husto kadi ti nangngegmi. Agmanu-mano. Naku, sir, amangan no abutennakami agingga iti Valentine’s Day a mangleppas kadagiti ar-aramidenmi. Ulitenmi nga i-key-in ti makabulan a transaksion? Maasiankayo met koma kadakami.”

       

IDI makapanawda, nagkiriring ti hotline a telepono iti rabaw ti lamisaanko a direkta iti Presidente ken General Manager. Ti GM ti adda iti linia.

        “Norman, kasano ti kapudno ti report a saan laeng a simmippit no di ket kimmagat ti Christmas Bug. Nawipe-out kano amin dagiti impormasiontayo!” malagawan ti boses ni Mr. Santos.

        “Boss, intact dagiti back up. Tallo nga oras ti kalkulak a kabayagan a pannakaisubli ti network communication. Padasenmi nga irestore iti kabiitan a panawen,” inreportko.

        “Okay, rugianyon. Dakkel ti panagtalekko kenka ken dagiti taom. Good Luck!” Imbabana ti teleponona.

        Simmaruno a nagkiriring ti trunkline iti sangok. Tawag manipud iti dispatching. Ti dispatching ti maysa a kritikal a naka-online iti network. Nakapila kanon dagiti trak ta manu-mano ti panagipreparada iti delivery receipt ken official receipt. Iti padasmi iti napalabas, ti maysa a kustomer tallo a minuto nga i-generate ti computer dagitoy. Sangapulo agingga iti kinse minutos no manu-mano ta adu pay ti i-verifyda kadagiti masterlist. Iti computer, ti program ti ag-verify iti uneg ti system ta nakastore dagiti impormasion a masapul a maiprinta kadagiti nasao a resibo.

Timman-awak. Makita ditoy kuartok ti opisina ti dispatching. Pudno. Atiddogen nga agpayso ti pila. Adu pay ti agsangpet. Kapigsa manen dagiti umay gumatang iti bato no kastoy a malpasen ti panagtutudo ta kasla uong mannagadu nga agtubo dagiti proyekto ti construction. Iti pattapattak, agarup kuarenta dagiti nakapila a dump truck.

Nagsasaruno a simrek da Arnel, Jerry ken Erik iti kuartok. Naggapuda idiay canteen a nagmerienda.

        “Boss, grabe ti epekto ti Christmas Bug! Addaak idiay warehouse itay rugianna ti agdadael. Maudin daydiay idis-ableko a CD ken diskette drive itay umatake ti virus!,” impadamag ni Arnel.

        “Ammoyo, balewala ti rigattayo. Saan a naggapu kadagiti terminal ti virus. Suspetsak, naggapu iti Internet kas iti daydi Love Bug. Adda nanglukat iti e-mailna,” imbagak ti pattapattak. Jerry, kaano ti naudi a panagback-upmo?” sinaludsodko.

        “Maysa nga oras sakbay a simrek ti Christmas Bug. Boss, adtoy ti kompleto a log dagiti back uptayo,” inyawatna ti listaan.

 

        “Arnel, kaano ti kabiitan a panawen a maisublitayo ti biag ti network?” kinitak ni Arnel.

“Boss, tallo nga aldaw kas idi matamaantayo ti Love Bug. Linisentayo pay nga umuna  ti hard disk ti server santo iformat. Sumaruno ti installation ti OS ken dagiti application program. Irestoretayo ti kaudian a back up santo pay laeng maaramat dagiti user dagiti terminalda,” insungbatna.

        “Siguro, awaganyon dagiti pamiliayo. Ibilinyo nga itulodandakayo iti pungan ken ules. Ditoytayo a maturog agingga iti ditay’ marestore ti network. Ken wen, ditoytayo metten nga agpaskua. Itulod metten dagiti pamiliatayo ti noche buena,” sinaggaysak ida a kinita.

Adda panagkitakit ti ikikitada. Nakasaganada metten nga agbakasion kadagiti probinsia a pakipaskuaanda.

“Ammoyo, sinurotko la koman ti balakad ni misisko a gumatang iti adu a baygon a pagispraytayo kadagiti computer. Saan ket ngata koma a nakastrek ti Christmas Bug a kaarngi ni Jollibee!” inrungiitko.

        Nagellekda. Napukaw ti tension kadagiti rupada. Iti nabayagen a panagkakaduami iti trabaho, no agangawak iti tengnga ti krisis, ammodan nga addan  pangsolbar iti agdama a problema.

“Okay, Arnel, isukatmo daydi reserbatayo a server idi agipangta ti Y2K bug iti natamaan a server.  Erik, isupervisemo ti panag-log-in dagiti user. Jerry, irestoremo ti kaudian a back-upmo. Iti uneg ti dua nga oras masapul a maka-onlinetayo!” imbilinko.

Awan ti naggunay. Nakamulagatda kaniak.

“O, ‘niat ur-urayenyo. Aggunaykayon!” Timmakderak manipud iti swivel chairko.

 “Kua, boss, mabayag nga iformat ti baro a server. Abutenna ti maysa nga aldaw ken …,” pinutedko ti dadduma pay a sawen ni Arnel.

“Malagipyo idi nagobertaimak idi naminsan nga aldaw? Naformatkon. Nakopiakon amin a linaon ti agdama a server. Ti laengen kaudian a data transaction a back-up ni Jerry ti irestoreyo,” inlawlawagko.

Sipapartakda a naggunay tapno tungpalenda dagiti bilinko.

       

NAANNAYAS ti taray ti baro a kotsek iti highway. Im-imasek ti dumngeg kadagiti samiweng a pamaskua manipud iti stereo bayat ti panagngatingatko iti chiklet tapno diak agdungsa. Nabanglo ti pug-aw ti air con. Angot kabarbaro. Agur-urok dagiti pasaherok ta alas tres iti parbangon itay aggapukami iti subdibision a pagnaedanmi.

Napigsa ti urok ni baketko iti abayko. Medio nakanganga. Sinimpak ti seatbeltna idi agirig ti ulona amangan no mabekkel. Iti likud, nagtengngaan dagiti ubbing ti yaya ken katulong. Nakasanggir ni Felice Anne iti abagana  idinto a nakapungan ni Nico Paolo iti

saklotna.

‘Diaske a Christmas bug!’ naisipko. Nagistay ketdin naunsiyami ti pannakipaskuami idiay La Union. Imbag la ketdin ta di pay nagkupas ti abilidadko nga agtrouble shoot kadagiti krisis basta computer ti pagsasaritaan.

Alas singko iti bigat ti oras ti relo iti dash board. Addakamin iti Pampanga. Pinattapattak nga alas nuebento no dumanonkami idiay Bacnotan. Kasla makitkitakon ti pannakasdaaw ni Anti Silay. Ti ammona, dikami matuloy ta intawagko nga adda problema a risutek idiay opisina. Imbag ta diak imbabawi ti reserbasionko iti high school reunionmi. Nagay-ayam ti maysa a saludsod iti mugingko. “Nakagteng met la ngata ni Joy?”

Naputed ti panagar-arapaapko idi aggaraw ni baket. Sinimpana la gayam ti kukotna. Madamdama pay agur-urok manen a nakanganga. #

       

Copyright 2008 by ANSEL D. CARGO.

All rights reserved.

Last 10 posts by Ansel Cargo

• NARAGSAK A PASKUAM, NORMAN MAGLAYA! - December 24th, 2008
• Krus iti Abaga - December 12th, 2008
• DAGITI ITIK - November 28th, 2008
• KREDIT KARD - November 25th, 2008
• AGPATARIMAANAK MAN, MANONG... - November 22nd, 2008
• NO AWANTON TI PATEGKO KENKA - November 13th, 2008
• DITOY PAGANIAN - November 12th, 2008
• Gapu Kadi ta Mangmanggedkami Laeng? - November 11th, 2008