no basaek panonot iti tedted todo
kadagiti napalabas a panagdunggo
adda pay ngata maarikap a maibel-a bel-a
malaksid tay nagumok kaunggak; selya

selya manaynay nga pagpegpeggedan
intuket no makalipat pinagdungnguan
gaput pakalmes toy nomo a gasat
nga palalo unay a marigrigat

malipatak aya a basaen
panagayat a nanglipasen
panagdungngo nga inruknoy na kaniak
ken dagiti bin-i rigat ken karadkad

naglabas dagiti aldaw naiyuper dero
awan nabati pulos malaksid dungngo
panagindeg ayuyang nat kaunggak
tungpal tanem biagko ik-ikutak

tatta agun-unnoy panangiliw ko kenka
tay pamuspusak a pangliwliwat dusa
kadagiti naglabas nga panawen a maukag
tay ladawam sarming ko ken ranyag

ladawam naiyuges ti nadungngo a lapis
indeg nga naibenggas toy pusok ken saning-i
agmaymaysa pakalaglagipak kenka
nga saan aglumen tungpal tanem

toy kararwak apan agdaldaliasat
diyay dalan nangibatyam paypayat
idiay karayan beata ken hilom ababaw
toy pusok sikat manaynay a ibugbugkaw

namin-anuak nga narakep naunday a lagip
idiay sirok ti nalabasan ta a mangga nailukip
didiay bunga nga kayat monga purusen
pinuros ko para kenka ta sikat dungdungngoen

tay amina bagik makitinnultulid saem
gapu madandanaganak idi sika ket agsakiten
apo unay kararag ko agparintumnengak payen
agyamank la unay paraiso adda silid pangyuyem

ar-arugek tay ladawam piman
diay natikag nga karayan aggigiyan
sursurtek tay maay-ayo nga playa
ken paypayat mo tay bato, naimula

agsubsubli a kasla birbiruken ka
ditoy nadungngo nga panawen simmina
malagip ko no apan ka agdigos masapsapa
saan ka makamakam tay baybay; pagadalemna

kaslak mangmangngeg dagiti manaynay mo a bel-a
“tallo nga aldaw nga saan tayo nagsarak”
ti sungbat ko adda karakep na nga paggaak
“no tao nga agmaymaysa adu daytoy a sagana”

apay ngata awan nabati a nalimed
a matandaanak kadagiti ragsak a napalabas
ti panagpanpanonot ko luwak kumanapraas
guyod nat unnoy ko ” o, daksang gasat”

adino ni selya ay-ayot kaunggak
apay panangdungngo saan nagbayag
katno a tiempo a dagiti taldiyap na
ket saan a kararwak, langit ken biag

apay ngata idi kami nagsina, apay
toy daksang gasat a biag di pimmusay
no iladawak toy ipapatay ko
selya toy pusok sika tay rayo

daytoy nga un-unnuyen nga di matepelan
o! ragsak nga nanglipat sikat gapuanan
isut nangigawid kanyak nga agdaniw
biag nga naka-as-asi inikkak samiweng

dagiti dung-aw ko nagbalin umel
naunday nga sao gapu tay diyosak ngelngel
ta uray sangkabassit diyak kayat malait
magasatanak koma mangngeg mo dagitoy nga ayat

daytoy punganay unnoy ko nga kulyapis
diay madayaw nga paypayat mo maimantilis
arakupem koma uray naglumen tay engel
indeg nga arig perlas toy pusok naiwelwel

no tay pagtungpalan ket kababainan
naganar ko dayaw ti bannog nga puonan
no surutem dagitoy nga dungdung-aw
panonotem koma toy nomo agpadpadayaw

nararagsak nga diyosa ti lawa ti bai
sirena kansiyon da ket makaliwliwa
sikayo tattan ti dungdungwen
ta napalalo toy diyosak narakep saem

ulliyem dagiti nakaalad nga tambak biagko
nakakaasi nga kansiyon toy lira iruknoy mo
no daytoy nga agsasao nga biag ket masdo
toy napudno nga ayat gandat nat agrayo

sika ti sabong toy dungdung-aw, selya
maipakita nga M. A. R. napipintas a letra
birhin nga ina ken anak siak agsapata
F.B. toy napudno nga mangayat kenka

sssssssssssssssssssssssssssssssssss
sinurat ni apong ikko daytoy ti sarita
tagakarayan. isu daytoy nangparigat
kiniak iti haiskul ta isaulo mi met.
ti kaso na diyak pay maamiris, ngem
kalpasan inpataros ko ti pangasinan ken
ilokano.lakay ikko kayat ko la nga
maiyebkas dagiti kakabsat ko dagiti
un-unnoyem. pakawanem, ala wen apong.

http://poemhunter.com/manonton-dalan/