Agtil-aykayto Koma A Pumanaw, DJ Ken Dom
August 27, 2008 by Corazon Quiamas filed under Poetry | 449 views
Planomi ken inayo ipadawatmi koman
Dagiti ay-ayam; dagiti nadakkelanyo
A sapatos ken pagan-anay ngem saan
Ta intalimengmi ketdi iti bodega ti pusomi.
Ta ‘ton bigat tumalikudkayo; inkayon
Purosen ti pannakabagiyo a sabong
Ket imulayo ti bin-i nga imbunga ti bin-i.
No makapanunotkayto
Pumasiarkayo ditoy taeng ti dungngo
Dikayto koma agpadpadlaw
Ta addakamton iti lubong ni lagip
Daydi naunday a pinagtagibi; makitadakto
A nakatugaw iti dagidagi a kayo;
Buyaendakto ta buybuyaenkayto
Nga agbisbisekleta iti arubayan
Ti panunot; iti kuarto, addanto ni inayo
Siripenyonto bayat a pelpellesanna
Dagiti imahen ti pinagubingyo;
Iti kusina, makitadakto idiay
A maisursurot nga agnganga
A mangsubsubo kadakayo.
Inton pumanawkayo agtil-aykayto koma
Nga umadayo tapno saan a mabugiaw
Dagiti dua nga ubbing nga agar-arindangga
Nga agay-ayam iti pasilio ti barukong
Ti saanto nga agpatingga nga iliw;
Ta dakayto a kanayon ti nasinggit
A gargarikgik iti aglawlaw; dagiti
Makaray-aw nga aglagtolagto a saka
Iti rabaw ti katre iti siled ti naulimek
Ken agparis a mail-ila a kaunggan.
Click on the Image for Details
virtualfriend
Makaisemak man kabsat!
Ah, ti biag, kas tay kunadan, ket kasla istoria a ‘di maputputpot. Iti di mabayag, kalpasan a maidulin dagiti lampin, ket dagitinto metten appom ti umay agpatarimaan kenka iti kadena ti bisikletada.
…ket ti panagtil-ayda a pumanaw, agsublidanto a dimo mapupuotan!
More from you Kakang!
August 27th, 2008 at 2:30 pmCorazon Quiamas
Wen, kasta a talaga ti biag, kabsat. Agsaksakroy iti adu a bugas ti pammateg. Agyamanak unay iti komentom.
August 28th, 2008 at 3:38 pmSherma Benosa
Daytoy ti klase ti daniw a nagubbog iti barukong ti managayat nga ama.
Awan ti anak a madedikaran iti kastoy a daniw a di agubbong dagiti luana. Daytoy ti klase ti ayat a nasin-aw, suknorenna ti kaunegan a paset ti kararua.
I salute you, Manong, not just for your good poem, but for the kind of a father that you are.
August 29th, 2008 at 2:26 pmCorazon Quiamas
Wen ken wen kunakto manen, adingko Sherma. Idi ikurkur-itko daytoy a daniw, agagneben dagiti matak; tunggal basaek, agagnebda latta. “Hmp, ania metten, nagar-aramidak la’t pagliplipiasan dagiti matak,” kunkunak nokua iti bagik. Hehehe…
Agyamanak manen iti komentom.
August 29th, 2008 at 3:04 pmka loren
Na ay, kasla magudua ti riknak: naragsak ken naliday nga agpasungad ti sumangpet a panawen. Naragsak ‘ta umudunto ti manglawlaw kaniak nga ubbog ti ayat; naliday, ‘ta dumtengto ti panawen nga agwaywayasakton. Napintek ti pannakailadawan dagitoy a mapagteng iti daytoy a daniw ni Apo Corazon Quiamas. tiraem latta apo.
August 29th, 2008 at 4:14 pmCorazon Quiamas
Nagammatam ti makilinlinemmengan a rikna ti daniw, Ka Loren. Ikkam latta met ti agsurat. Nananam ti getta ti mapespes a kaipapanan dagiti daniwmo.
August 30th, 2008 at 2:13 pm