Naluktan itay Julio ti maika-11 a panagpasalip iti sarita para kadagiti agdadamo a mannurat iti Iloko ti AMMA Foundation Literary Awards, kas impakaammo dagiti mangimatmaton itoy a tinawen a pasalip, da Amado I. Yoro, Mario Orbito, Mike Ulibas, Alfredo “Fred” Quibol, ken Francisco T. Ponce, agpapada a taga-Hawaii.

 

Kompleto a pagannurotan ti salip:

 

1. Maluktan ti salip iti Julio 11, 2008 ken aggibus iti Enero 31, 2009.

 

2. Agpaay laeng ti salip kadagiti agdadamo a mannurat iti Iloko. Itoy a pasalip, maibilang nga agdadamo ti mannurat no awan pay naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Hunio 30, 2008 a bilang ti nasao a magasin.

 

3. Siwawayawaya ti autor a mangpili iti topiko ti isalipna a sarita.

 

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times New Roman Medium 12 points iti computer), ken adda espasio wenno margin a maysa a pulgada iti amin nga igid ti papel.

 

5. Maysa laeng a sarita ti mabalin nga isalip ti tunggal autor.

 

6. Nasken nga orihinal, di pay naipablaak wenno naadaw iti ania man a sinurat ti isalip.

 

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

 

8. Ipatulod ti pakisalip babaen ti koreo wenno personal nga idatag ti pakisalip itoy nga adres: Short Story Writing Contest, 11th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Enero 31, 2009. Saan a mairaman iti salip ti entry a maawat kalpasan dayta a petsa.

 

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw.

 

10. Mapakaammuanto dagiti mangabak no kaano ken no sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 ken/wenno 6, maibabawi ti premiona ken mapawilanton a makisalip iti ania man a pasalip ti AMMAFLA.